МОЛИТВА СВЯТИТЕЛЮ ДМИТРИЮ РОСТОВСКОМУ

 

О святителю Дмитрие, великий угодниче Христов, златоусте Российский! Услыши нас грешных, молящихся тебе, и принеси молитву нашу к Человекрлюбцу Богу о рабах Божиих (имена). Умоли Его благосердие, да не осудит нас по беззаконием нашим, но да сотворит с нами по милости Своей. Испроси нам у Христа Бога нашего мирное и безмятежноежитие, здравие душевное и телесное. Даруй нам богоугодно прейти поприще временныя жизни: избави нас от воздушных мытарств и настави нас на путь, ведущий в селения праведных; подаждь нам твое архипастырьское и святое благословение, да оным осенями , избавимся от козней лукаваго и избегнем от всякой бедю и напасти. Услыши моление наше, отче Дмитрие, и моли непрестанно о нас Всесильнаго Бога, славимаго и покланяемаго в трех Ипостасех, Емуже подобает всякая слава, честь и держава во веки веков.

 

МОЛИТВЫ СВЯТИТЕЛЯ ДМИТРИЯ РОСТОВСКОГО


Господи! Все желание и воздыхание мое да будет в Тебе. Все желание мое и рачение мое в Тебе едином да будет, Спасителю мой! Все изволение мое и помышление мое в Тебе да углубится, и вся кости моя да рекут: «Господи, Господи! Кто подобен Тебе, кто сравнится силе, благодати и премудрости Твоей? Вся бо премудре, и праведне, и благоутробне о нас устроил еси».

* * *

Да ничтоже мя отторгнет, да ничтоже мя отлучит от Божественныя Твоея любве, о Боже мой! Да ничтоже пресечет, ни огнь, ни меч, ни глад, ни гонение, ни глубина, ни высота, ни настоящая, ни будущая, точию едино сие да пребудет в душе моей выну. Ничтоже ино да возжелаю в веце сем, Господи, но день и ночь да взыщу Тебя — Господа моего: и да обрет, вечное сокровище приму, и богатство стяжу, и всех благ сподоблюся.